Sou Rapò final Koudèkont - Nòt ANVA - 3 Jen 2019

Pòtoprens 3 jen 2019

 

Mesaj pou nasyon an

 

Onè,

 

Nou fè wikenn nan n ap tann pou Prezidan Jovenel Moïse pwononse li sou piblikasyon rapò final Petrocaribe a. Antanke moun Konstitisyon an bay pou asire bon fonskyònman enstitisyon yo, se li ki pou ta di nasyon an kijan n ap vanse apre jou 31 me 2019 la.

 

Nan rapò Koudèkont lan, nou aprann, avèk anpil detay, kijan yon gwoup moun ak enstitisyon mete ansanm pou gaspiye yon lajan yo te prete n, yon lajan nou tout ak pitit nou pral gen pou n peye sou 25 lane. Se yon nouvèl ki pa ka kite ankenn Ayisyen, ankenn Ayisyèn diferan. Yon moman ki dwe make nan listwa tankou kòmansman lafen enpinite nan peyi a pou nou pran wout #AyitiNouVleA.

 

Erezman pou nou, menm si Prezidan Jovenel Moïse ta  sanble twò okipe nan moman sa, nou genyen ansyen entèvansyon l yo pou klere nou sou chimen Leta Ayisyen l ap dirije a pare pou vanse ak #PwosèPetroCaribeA.

 

Nan demen, gwo mach 17 Oktòb la, a 9:30 nan maten, Prezidan Moïse te fè yon tweet pou mande tout moun ki endekse yo mete tèt yo a dispozisyon lajistis. Jodi a, a 9:30 nan maten, nou envite Prezidan Moïse, menm jan l mande lòt yo fè l, pou l mete tèt li a dispozisyon lajistis.

 

Prezidan Moïse endekse nan rapò a koz enplikasyon konpayi l nan zak koripsyon, malvèsayon ak detounman lajan Leta. Yon Prezidan dwe preche nan bay bon egzanp. Nou envite Prezidan an aji an bon sitwayen, mete l a dispozisyon lajistis, pandan lòt moun ki enplike yo ap fè menm jan.

 

#AyitiNouVleA se ansanm n ap konstwi l.

 

Respè,

 

Ayiti Nou Vle A

Kite premye kòmantè a

Souple verifye imel ou pou yon lyen k ap pèmèt ou aktive kont ou.